في حارة الدرب الأصفر ...

هل حدث أن ذهبت مع الأصدقاء الى مكان تعده محبب اليك من قبل ان تراه او تعرف عنه شيئا غير عنوانه ؟؟؟

لقد حدث لي ...

انه جمال العالم حين تجتمع روعة الزمان مع روعة الصحبة .. يتعانقان ثم يستدعيان روعة المكان لتحضر مثل هذا الاجتماع التاريخي للروائع ...

ثم يتقرر بعد هذا الاجتماع المفتوح ... والغير سريّ اطلاقا اضافة صور اخرى الى شريط الذكريات ... الذي لا يلبث ان يأتي ويمر امام نظارتي الطبية اجمالا ثم تفصيلا اذا تعرضت الى نسمة خفيفة و منعشة من هواء حي الدراسة من فوق تبّة حديقتها الشامخة ...

الزمان ... 29-1-2009 .. بعد أسوأ امتحان يمكن ان تمر به سبقه ضغط عصبي حاد وتلاه توقعات شبه مؤكدة لنتائج مبشرة للغاية :( :( .. بس سيبك ... ساعة الفسحة ما تتعوضش :) :)

الصحبة ... ميم تكعيب + ش

المكان ... بيت السحيمي في حارة الدرب الأصفر داخل حي الجمالية.. بعد ان تجتاز خان الخليلي وتلتقي في الطريق بألم مبرح في العضلات اثر صعود المنحدر ... فيعانقك عناقا حارا ويرافقك حتى يطمئن انك وصلت الى احضان لحافك بالسلامة ... واذا كان كريما سيبقى في ضيافتك عدة ايام

و اليكم جزء من الصور التي أضيفت الى درج المكتب ... مش الدرج اللي في الاوضة بتاعتي ... لأ ... دة درج تاني خبيته جوا تلافيف تلافيف التلافيف المخية بتاعتي ... حتى يتعذر ... بل يستحيل ضياعه مع التجديد والاحلال المستمر للخلايا العصبية داخل هذا الرأس الصغير ...

شارع الدرب الاصفر ...

احدى شرفات المنزل من الخارج ... و من الداخل ...

***********************

الحديقة الأمامية في مدخل المنزل .. موجودة في القسم الشمالي ...

تحتوي الحديقة الامامية على دكّة خشبية مزينة يطلق عليها " التختبوش" ... للأسف مصورتهاش ...

بس هي حاجة عاملة زي الكنبة الخشب .. بس كتير جنب بعض على شكل مربّع ناقص ضلع ...

وتتوسطها أريكة فخمة لشخص واحد ... شبه أريكة الكابيرة في فيلم كتكوت ... :)

الأريكة دي مخصصة لكبير العيلة ... او ضيف الشرف ...

الحديقة الخلفية ... وكانت أكثر اتساعا و تحتوي ساقية وطاحونة و بئر ماء ...

************************

البئر هو الحتة اللي لونها ابيض وعالية شوية على يمين الصورة الاولانية ... على فكرة البيت فيه اكتر من بير ... حوالي 2 او 3

والحديقتين دول كل واحدة اسمها "صحن الدار "

وهذه ساقية ...

وهذه طاحونة .. يبدو ان الطاحونة لم تمتد اليها ايدي الترميم التي زينت هذا القصر ...

فسقية - حاجة كدة زي نافورة يعني - وتتدلى من فوقها ثريا ... مكانتش منورة لأننا كنا هناك بالنهار و الوزارة بتوفر كهربا ... بس كان شكلها حلو اوي .. :)

الصورة دي مش بالكاميرا بتاعتي ... نظرا لتوفير الكهربا ... :)

الفسقية دي في الدور الأرضي ... و الدور دة في البيوت العربيه القديمة كانوا بيسموه "السلاملك " مكان الرجال واستقبال الضيوف .... و بتبقى مقسومة لايوانين قصاد بعض .. بينهم حتة منخفضة اللي هي فيها الفسقية ... وبيسموها "درقاعة"

غرفة جلوس ... فيها قعدة عربي على كيفك ... تعجب الملك ... وهذه الغرفة في الطابق الثاني ...

***********************

و دة بقى اللي اسمه "حرملك" يعني الدور الخاص بالنساء ... عادة بيكون الدور التاني زي ما قلنا ..

وفكرة السلاملك والحرملك دي كانت جزء أساسي في عمارة العصر العثماني ... لأن البيت اتبنى في الوقت دة ...

هذا ال view من شرفة في الطابق الثاني .. تطل على الحديقة وعلى مشربية مواجهة في البيت الكبير المترامي الاشلاء .. اوالاطراف والحدود يعني ....

الحيطان بتاعة الشرفة دي كان منقوش عليها اشعار من نهج البردة بخط جميل اوي... :)

ودي حبة صور للمكان قبل وبعد الترميم ... المكان دة اتعمل فيه شغل جامد أوي ... :)

**************

************

و حكاية البيت دة بقى ... انه كان مقسوم جزئين .... القسم الجنوبي .. وبناه الشيخ عبد الوهاب الطبلاوي تقريبا في منتصف القرن السابع عشر ... وبعده بقرن جه الحاج اسماعيل اشترى القسم الجنوبي و أنشأ قسم الشمالي .. وخلاهم بيت واحد ....

طيب اسم السحيمي دة جه منين ؟؟؟

دة كان اسم أخر واحد عاش فيه هو وعيلته .. الشيخ امين السحيمي ... كان شيخ في الأزهر ... وتوفى سنة 1928 ...

الغريب ان البيت الطويل العريض دة ما كانش فيه ولا سرير !!! رغم انهم كانوا اخترعوا السرايرمن قبل الوقت دة

بس اهل البيت كانوا بيناموا على مراتب قطيفة على الأرض ...

يالللا .. كفاية عليكو صداع كدة ... و اتمنى اشوف حد منكو هناك بعد ما شاف الصور دي ... :)