ركبت الميكروباص كان فيه السواق وواحدة ست بجلبية و طرحة بتاكل ساندويتش .. " تقطع حتة من الساندويتش " ... و تمدها و تقوللي اتفضلي يا بنتي ... لازم تاكلي معايا ...
اول امبارح كنت رايحة الكلية ...طلبت من السواق ينزلني السلم شمال عشان مش بعرف اعدّي الشارع ... قاللي انا لو ظابط قفشني في الحركة دي هيدفعني 150 جنييييه .... "ثم ابتسم " ... بس انا هاضحي بال150 جنيه عشان خاطرك ...
سواق اخر ... اديني نزلتك شمال اهو عشان العربيات ... بس عدي من قدامي دلوقتي عشان العربيات جاية من ضهرك .. " و لما شكرته اوي " قاللي .. امّاااااااااااااال ... دة انا بنتي - اسم الله - عروسة زيك كدة ..
"سواقين الميكروباص ليسو ملائكة الى هذا الحد ... و لكن صادفت منهم هؤلاء ..
"
1 التعليقات:
"كن جميلا تري الوجود جميلا"
البيت ده بتاع اليا ابو ماضي زمان اخدناه في المدرسه وحفظناه كويس اوي
والواحد دايما بيردده لما بتقابله حاجه مش حلوه في الحياةويقول لنفسه: خليك انت احسن هاتشوف الحاجات الجميلة حواليك وتحس بيها ...وفعلا ساعات بيجيب نتيجه
بس في ناس...مش كتار أوي حوالينا
ممكن ينطبق عليهم البيت ده بس مع بعض التعديلات الطفيفة
"أنت جميلا...اذا انت تري الوجود جميلا...وتجعله أكثر جمالا"
الله ينور...استمري في اضفاء الجمال للحياة
إرسال تعليق